Sarrera

1971ko urriaren 4an Errenterian jaio zen. Hamabost urterekin hasi zen gitarra jotzen eta lehen kantuak egiten. 1989an lehen grabaketa burutu zuen eta 20 urte betetzerako argitaratu zuen lehenengo diskoa. Bakarlari bezala hamabi disko kaleratuak ditu gaur arte. Euskal Herriko txoko gehienetan kantatu du. Zuzenean Silvio Rodriguez, Mikel Laboa, Erramun Martikorena, Paco Ibañez edo Eñaut Elorrieta bezalako kantariekin aritu izan da. Euskal Herritik kanpo emanaldi ugari burutu ditu; Frantzian, Ingalaterran, Espainian, Irlandan, Txinan, Kuban, Venezuelan edo Argentinan. Estatu Batuetan ere kontzertu ugari egina da, Kaliforniako Noka taldearekin elkarlanean disko bat kaleratu zuelarik. Pako Aristi idazlearekin eta Benito Lertxundi kantariarekin batera Plazer bat duk, Benito! gogoeta liburua argitaratu zuen. Bere azken lana 2019an argitaratutako zuzeneko grabaketa bat da, Biribilean izenburu duena.

Euskal Herritik kanpo

-1992an Pariseko Bretainiako Etxean Paco Ibañez kantariarekin batera. -1994an La Habanako Casa de la Trovan. -1995ean Estatu Batuetako Boise hirian Erramun Martikorena eta Tapia eta Leturiarekin Jaialdi izeneko festan. -1996ean Kanariar Uharteetan Hilario Camacho, Luis Mendo, Pablo Guerrero, Elisa Serna eta Quintin Cabrera kantariekin batera egin zuen sei emanaldiko bira bat. -1997an Pariseko Euskal Etxean. -1998an Madrilen Indio Juan eta Imanol Lartzabalekin. -1999an Venezuelako Caracasen eta Chichiribichen. -2001ean Kuban Festival Internacional de Solidaridad delakoan 30 herrialdetako kantariekin batera. -2002an Argentinan Madres de la Plaza de Mayo elkartearen eskutik hiru emanaldi Mikel Urdangarinekin batera Buenos Aireseko Sky Opera antzokian eta Museo del Che aretoan eta bat La Pampako Santa Rosa hiriko antzokian. -2003an hiru emanaldi Gran Canarian Fermin Romerorekin batera, Las Palmas, Arucas eta Telden. -2004an Madrilen Tontxurekin batera. -2006an Argentinan Pako Aristirekin batera Rosario hirian. -2009an Shangai-ko Euskal Etxean Donostiako Gaztelubide koroarekin. -2010ean Erramun Martikorenarekin bost emanaldi Californian eta Nevadan. -2011ean Londoneko eta Bartzelonako Euskal Etxeetan. -2012an Irlandako Derry, Belfast eta Dublinen bost kantaldi bertako kantariekin eta New Yorken eta Rodhe Islanden Eñaut Elorrietarekin. -2014an Noka taldearekin batera bira egin zuen Estatu Batuetan. Los Angeles, Bakersfield, Garnerville, Boise eta Ontarion. -2016ean Washingtonen ospatu zen Smithsonian jaialdian aritu zen, bai eta Kennedy Center aretoan eta Librery of Congress entzutetsua Noka taldearekin batera. -2019an Galizan eta Parisen aritu da bakarlari modura.

Diskogintza eta bestelako lanak

Hamahiru disko ditu bakarlari moduan, azken lana bere alaba Esti Markezekin erdibana. Beste kantari eta talde batzuen disko mordo batean ere parte hartu du. Ekoizle bezala hogeitik gora disko ditu, aipagarrienak Patxi Saiz kantariaren lanak edota Trikitixa Elkarteko Faborez izenburuko serie osoa. Irratian ere aritua da, 1994tik 2010era Herri Irratian Oroimeneko Portua eta Ahobete Hots saioak zuzendu zituen, bai eta Euskadi Irratian Kaja Beltza saioa ere. Pako Aristi idazlearekin eta Benito Lertxundi kantariarekin batera Plazer bat duk, Benito! liburua argitaratu zuen.